प्युठान जिल्लाको मल्लरानी गाउँपालिका–३ मा अवस्थित भानुभक्त माध्यमिक विद्यालयले आफ्नो स्थापनाको ५० औँ वार्षिक उत्सव (स्वर्ण महोत्सव) विविध कार्यक्रमका साथ भव्य रूपमा सम्पन्न गरेको छ।
शिक्षा, संस्कृति र सामाजिक सहभागितालाई केन्द्रमा राख्दै आयोजना गरिएको स्वर्ण महोत्सवले विद्यालयको गौरवपूर्ण इतिहास र उज्ज्वल भविष्यप्रतिको प्रतिबद्धतालाई स्पष्ट रूपमा उजागर गरेको छ।
स्वर्ण महोत्सवको समापन समारोह मल्लरानी गाउँपालिका प्युठानका अध्यक्ष कृष्णबहादुर खड्काको प्रमुख आतिथ्यतामा सम्पन्न भएको हो।
समापन समारोहलाई सम्बोधन गर्दै अध्यक्ष खड्काले भानुभक्त माध्यमिक विद्यालय प्युठान जिल्लाकै एकमात्र प्राविधिक विषय अध्यापन हुने विद्यालयका रूपमा स्थापित हुँदै गएको उल्लेख गर्नुभयो। उहाँले विद्यालयले प्राविधिक शिक्षामार्फत स्थानीय तहदेखि राष्ट्रिय स्तरसम्म आवश्यक दक्ष जनशक्ति उत्पादन गर्न महत्वपूर्ण भूमिका खेलिरहेको बताउँदै पालिकाको तर्फबाट आवश्यक सहयोग निरन्तर रहने प्रतिबद्धता व्यक्त गर्नुभयो।
विद्यालयका पूर्व अध्यक्ष तथा वरिष्ठ राजनीतिज्ञ बोमबहादुर खत्रीले विद्यालयले मल्लरानी गाउँपालिकाका विद्यार्थीहरू मात्र नभई प्युठान जिल्लाका नौवटै पालिका तथा छिमेकी जिल्ला अर्घाखाँचीका विद्यार्थीहरूलाई समेत गुणस्तरीय शिक्षा प्रदान गर्दै आएको उल्लेख गर्दै विद्यालयबाट उत्पादन भएका विद्यार्थीहरू विभिन्न क्षेत्रमा दक्ष जनशक्तिका रूपमा स्थापित हुनु विद्यालयको ठूलो उपलब्धि भएको बताउनुभयो।
कार्यक्रमकाे बीच–बीचमा रक्तिम सांस्कृतिक अभियानका पूर्व केन्द्रीय अध्यक्ष तथा जनवादी गायक जीवन शर्माले आफ्ना सन्देशमूलक तथा लोकप्रिय गीतहरूको प्रस्तुति दिनुभएको थियो। उहाँको प्रस्तुतीले समारोहलाई थप जीवन्त बनाएको थियो भने उपस्थित दर्शकहरू उत्साहपूर्वक रमाएका थिए।
विद्यालय व्यवस्थापन समिति अध्यक्ष जिवलाल खत्रीको अध्यक्षतामा सम्पन्न समापन समारोहमा मल्लरानी गाउँपालिकाका पूर्व अध्यक्ष अमरध्वज राना, विद्यालयका प्राचार्य चक्रपाणि पाैडेल, जनप्रतिनिधि, कर्मचारी, शिक्षक, अभिभावक तथा विद्यार्थीहरुकाे व्यापक उपस्थिति रहेको थियो।
स्वर्ण महोत्सवको मंसिर २९ गते लुम्बिनी प्रदेश सरकार सहरी बिकास तथा खानेपानी मन्त्री सराेज थापा (राेज राणा) ले उद्घाटन गर्नुभएको थियो।
बिद्यालयले स्वर्ण महोत्सव सफल पार्न सहयोग गर्ने पाच सय बढिलाई सम्मान समेत गरेको थियो।
